السلام عليكم و رحمة الله و بركاته
الموضوع كتبتو قبل سنتين و حطيتو في التمبلر فراح احطو هنا مره وحده ههههه
بما انو اسئلة كتيييييير تجيني عن الماك بوك وإزا كان كويس او لا؟ ، او ينفع للجامعه او ماينفع؟، انا حااحط تجربتي فقط و رأيي الشخصي فيه و انتي تقدري تحكمي إزا يناسبك او لا
و بما اني اكيد استعملت نظام الويندوز كم سنة فحياتي القصيرة دي هههه
فراح احكم على النظامين على حسب استخدامي انا و اي نظام ارتحتلو اكتر
نبدأ؟؟
اول شي المواصفات:
المواصفات من موقع آي ستايل*
سعر الجهار لما اخدته: ٦١٩٩ريال سعودي
دحين نزل سعرو وسار ب ٥٣٩٩ ريال سعودي
اخدتو اونلاين من موقع آي ستايل و الدفع كان عن طريق الاستلام
ودي صورتو اول ماوصلني
طيب دحين حنتكلم عن النظام بشكل عام
النظام جداً جميل وسهل وسلس ابداً مو صعب مجرد ماتتعودي عليه حتحبيه جداً و الحمدلله دحين بأستخدمو لمدة تلاتة سنين و شي تقريباً ماواجهتني اي مشكلة معاه و بالنسبة للي مستصعبينو بسبب اللغه الانجليزية تقدروا تقلبوه عربي كامل يعني القوائم اللي فوق و كل شي يسير عربي و انا عن نفسي ارتحت نفسياً مع الماك اول مع لابتوبي القديم كل كم شهر لازم اوديه يتفرمت و غير يعلق و يقفل فجأة عليا وانا بااشتغل و البطارية انخربت هههه
الكيبورد ماراح اتكلم عن الإضاءة لأنو دحين اغلب الاجهزة الجديدة الكيبورد حقها فيلو اضاءة فـ مو شي جديد كان جديد اول ماطلع بس احس دحين سار عادي طيب اماكن الحروف مرتبة اكتر من الويندوز و تتعودي عليها بسرعه انا حقي اصلاً فيلو الحروف العربية موجودة من نفس الوكيل فما احتجت لحفر الحروف و الحوسة دي هوا صح شكلو احلى بالحروف الانجلش لحالها بس كـ شي عملي فضلت انو الحروف العربية تكون موجودة في الكيبورد بإمكانك من لوحة التحكم في الجهاز تخلي ترتيب الحروف نفس اللي في الويندوز لكن انا ماافضل دا الشي شخصياً
البرامج و الافلام
طبعاً ماحتكون البرامج كتييره زي الويندوز بما انو مستخدمينو اكتر زي اكتر مستخدمين الويندوز يستخدمو برنامج داونلاود مانجر في الماك مو موجود اكيد في برامج بديلة بس بما اني مااستخدمو اساساً فما دورت عنو برامج مايكروسوفت اوفيس اكتره اللي بيحولو من ويندوز لماك يسألو اول شي عن برامج الاوفيس اللي هيا الوورد و البوربوينت ...الخ بالزات الطلاب سواء جامعيين او غيرهم عشان البحوث حقتهم و كدا برامج الاوفيس موجودة و انا محملتهم لكن الشي الوحيد اللي مو كويس هوا انها غير داعمه للعربي بشكل تمام ، كيف؟ يعني تقدري تكتبي و تزبطي شغلك كلو عادي جداً لكن القوائم تكون انجلش و لما تنسخي حاجة من النت و تلصقيها في الوورد الكلام يطلع ملخبط و مقلوب و البوربوينت نفس الشي و احيانا الحاجات اللي تحفظيها في الماك ملف وورد مثلا و تبي ترسليه لشخص مستخدم و يندوز يطلع الكلام مقلوب مو دايماً احياناً.
في برامج بديلة لبرامج الاوفيس
اللي هيا
Pages
بديل Word
Keynote
بديل Powerpoint
Numbers
بديل Excel
الافلام
ازا كانت الشاشة ريتنا حتستمتعي بالفلم جداً خصوصاً إزا كان Full HD و الترجمة تشتغل تمام التمام اهم شي تنزلي نسخة متوافقة مع نسخة الفلم
اخر شي
لا تاخدي شي الا ازا انتي مقتنعة بيه تماااماً و كمان شي تاني تحطيه في بالك انو لو اخدتي الماك بشاشة ريتنا مدخل السيدي مو موجود و لا تسمعي كلام دا و دا انتي ابحثي و اقري كتيييير قبل لا تشتريه شوفي ازا حينفع مع استخدامك او لا لانو ازا مانفع مع استخدامك و حتشتريه كشكل ماانصحك تاخديه و تقدري بالمبلغ حقو تشتري افضل لابتوب ويندوز بمواصفات جيدة و في النهاية الخيار ليكي ان شاءالله الريڤيو فادكم ولو بشي قليل .
Written in: March 15 2015
Edited in: March 21 2017
