السلام عليكم و رحمة الله وبركاته
نبدأ في الجزء التاني على طول ..
- الإعتناء بيها.
- اماكن شرائها.
- بعض الشركات المشهوره .
- بعض الشركات المشهوره .
الإعتناء بيها.
طيب كيف نعتني بيها؟؟
اول شي لاتخليها تتعرض للشمس لفترة طويلة مثلاً يومين او شي او انك تخليها جنب طاقة او كدا يفضل تخليها في مكان مضلم لما ماتحتاجي تصوريها مثلاً او تلعبي معاها وكدا لأنو لو خليتيها في الشمس لمدة طويلة حيتغير لون الجسم و يبدأ يصفر و إزا كانت تان حيبدأ يخضر 💔
تاني شي حاولي ماتلبسيها ملابس غامقة لوقت طويل لأنها حتطبع على الجسم ازا ماكان جسم الدمية محطوط عليه Body Blushing فما حيكون عندك مشكلة لانو حيتمسح بسرعه بـ Magic Eraser اما لو كان موجود ع الجسم Body Blushing ف حتكون مشكلة لأنو حيتمسح غالباً فيفضل انك ماتخلي الدمية تلبس ملابس غامقة لوقت طويل
و تالت شي عامليها برقة نوعاً ما لأنها احتمال ازا عاملتيها بـ عفاشة ( يعني دفاشة بس باللهجة الحجازية ههههه) ممكن تنكسر زي الاصابع مثلاً او ازا طاحت بقوة من مكان عالي يمكن ينكسر خشمها او يتقشر الـ Faceup تبع الدمية
اكيد في حاجات تانية بس سقطت سهواً مني فـ راح احدث ازا اتزكرت شي غيرو
اماكن شرائها.
طيب دا اكتر شي مهم ينسأل عنو " من فين نشتريها؟ وبكم؟" 🤔
في تلاتة طرق تشتري بيها إما عن طريق [ الموقع الرئيسي للشركة ، موقع مجمع لعدة شركات (ديلر، تاجر) ، موقع يبيعها مستعملة (Second Hand ) ]
افضل طريقتين هيا الأولى و التانية لأنها اضمن شي اما المستعملة في ناس يكون عندهم ضمير ويقولولك حالة الدمية بالتفصيل سواء كان فيها شي مكسور او مبقعة او اتغير لونها او انها اصلية وكدا و في ناس من غير ضمير ماحيقولو شي او يمكن حتى مايرسلولك شي من الاساس او يرسلو كرتون فاضي فتفضلي شايلة هم ازا حتوصل او لا فلازم تنتبهي مرررره كتييير يا تشتري من ناس واثقة فيهم و تشوفي الناس اللي اتعاملوا معاهم قبل و بعدها تقرري
الموقع الرئيسي للشركة اللي تبي الدمية منها
تعتبر اكتر طريقة امنه لأنك ضامنه انها توصلك و سليمة كمان لأنو لو اي شي سار للدمية سواء انكسرت يدها في الشحن او شي فيها اتخرب هما حيتكفلو بالضرر اللي سار بس الشي الوحيد السلبي في الهواية ككل هو وقت انتظار الدمية لأنها ماتكون جاهزة اول ماتطلبيها و تدفعي يبدأو يصنعوها فتاخد ٢-٤ شهور تقريباً عبال توصلك احياناً توصل لـ ٦ شهور😭 دا الشي الوحيد اللي يقهر لكن باقي الاشياء تهون
المواقع المجمعة لعدة شركات
دي المواقع احلى شي في الحياة هرجتها انها تجمعلك شركات كتير مصنعة للدمى و تحطلك هيا في مكان واحد طيب ليش حلو نطلب منها؟؟ لأنو مثلاً عجبتك دمية من شركة و ملابس من شركة تانية ف حتضطري إنك تدفعي شحن للملابس و شحن للدمية اما ميزة المواقع دي لو كانو الشركتين موجودة فيها فـ حتشتري الدمية و الملابس و الشحن يكون واحد في احلى من كدا😍 و غير ازا تبي تشتري الشعر ( الباروكة ) و العيون فماراح تدفعي شحن لكل شي لحالو فكلو يتجمع مع بعض و ينشحن مع بعض و يوصلو مع بعض و في شي تاني كمان في احتمال انو تكون الدمية اللي تبيها موجودة اساساً ( In stock ) عندهم فماراح تستني ٤ شهور عشان تجيكي كلها مدة الشحن اسبوع او اسبوعين و توصلك ❤
اما مواقع الدمى المستعملة ماقد جربتها للأسف فماراح اتطرق ليها 😁
طيب نقطة إكسترا اللي هيا الاسعار 🤓
طيب طبعاً تختلف الاسعار بين الشركات اكتر شي يعتمد على حجم الدمية و ازا كانت محدودة لوقت معين او عدد معين منها او ازا كانت لشخصيات انمي مشهورة الهواية دي معروف عنها انها غالية حبتين بس مايمنع ابداً انو في شركات بتسوي دمى رخيصة نوعاً ما تكون اسعارها تقريبا 300$ و اقل و زي ماقلت انو الاسعار تعتمد على حجم الدمية و الشركة المصنعة او ازا كانت الدمية محدودة او لا
بعض الشركات المشهورة.
حـ احطلكم روابط لبعض الشركات اللي احبها و لازم كل يوم امر عليها اشوفها طلعت شي جديد اولا 😍❤
Soom
Iplehouse
Dollzone
Loongsoul
Switch
Immortality of Soul
RingDoll
Crobidoll
Migidoll
مواقع مجمعة للشركات :
Alice's Collection
Dolk Station
Legend Doll
و بكدا نكون خلصنا التعريف عن هوايتي الجميلة إن شاءالله مااكون نسيت شي
و إن شاءالله يكون عجبكم و ترقبوني في بوستات اخرى 😂
و إن شاءالله يكون عجبكم و ترقبوني في بوستات اخرى 😂
See You Lovelies..
